غير متصل
نصائح للحج أول مرة
نصائح للى بيحج لأول مرة ..لا تقلق ودع الأمر لله؛ كل من وصل مكه سيوصله الله لعرفات بإذنه وقدرته ..
يوم ٨ ذو الحجة بكل هدوء تلبس إحرامك وخليك ف وسط الناس لا تمشى منفرد .. لا تمشى منفرد .. لا تمشى منفرد .. ده مهم جدًا ..
والزم الذكر وان شاء الله سوف تصل عرفات بالصبر والدعاء وحسن الظن والتوكل ع الله
تعامل بأدب مع العساكر بالطريق لا تقل ما لا يليق بالإحرام والحج فهم ف النهاية إخوانك وبينفذوا تعليمات وبالنهاية بيتركوا الحجاج وبيفتحولهم المرور ولا يستطيعون تحمل إبعاد محرم وملبى لله
خليك مع الكثافات الكثيرة من الناس وعند التجمع انصح الجميع بالتلبية وهم غالبًا بيفتحوا الطريق للكثافات خوفًا من الزحام والتدافع
هتوصل عرفة ان شاء الله قبل الفجر
سواء ركبت أو مشيت
إسأل هناك عن ( مسجد نمره ) بيفتحوه قبل أذان الفجر بدقائق هتدخل بسرعة تحجز مكان وتصلى وتنام تحت المكيفات والمرواح
والظهر هتدعيلى لما تصحى وتقوم مرتاح وفايق لأن الناس بالشمس بره وانت هتفضل جالس بالمسجد وكمان هتحضر خطبة عرفات مع الإمام وهتصلى الظهر والعصر جمع تقديم
#تنبيه ..
اِحذر أن تكون جالس خارج حدود عرفات لأن المسجد فيه جزء خارج عرفات وخد بالك أول ما هيفتحوا المسجد هتلائى كراتين مصاحف هدايا بالمسجد خد بسرعة ليك ولأصحابك اللى معاك وخلى بالك خد الطباعة العربية عشان ف مصاحف أوردو وإنجليزية
بعد العصر أول ماتنكسر حرارة الشمس ممكن تطلع تتمشّى ف عرفات هيكون الجو كويس جدًا وهيعجبك المشهد بلاش تتعب نفسك وتدور ع جبل الرحمة عرفات كلها موقف وبيكون زحمة وهتتعب كتير وانت راجع من عليه
••• مهم جدًا جدًا لا تأكل كثيرًا عشان دخول الحمام صعب جدًا ف عرفات خليك ع الفواكه والجبن الخفيفة واشرب عصاير وسوايل كتير
المهم والأهم تبعد عن أي أكل بالشارع وخصوصًا الكبدة والفراخ والأرز مش نضيف وهيعملك تلبك ف المعدة ..
إطلع من عرفات بعد المغرب مباشرةً المشى أفضل لك حوالى ٦ كيلو لأول حدود مزدلفة لا تتاخر لاتتاخر لا تتاخر وهتعرف السبب بالليل
أول ما شوارع مزدلفة تتملى بالناس والطريق يبئا صعب ع اللى اتأخر ف عرفات وما يعرفش يتحرك لأن الناس بتوصل من التعب مزدلفة تفرش بالطريق وتنام
وخد بالك المغرب والعشا هتصليهم ف مزدلفة وتنام للفجر وتجمع الحصى من هناك وبعدين تطلع للجمرات
المشي أفضل بكتير من الركوب واللى هيمش هيوصل قبل اللى ركب حوالى ٨ كيلو للجمرات تقريبًا
هترمى جمره العقبة صباح يوم العيد وهتحلق أوهتقصر وتذبح ( لو هتحج متمتع ) كده عملت ٣ حاجات
• رميت جمرة العقبة
• حلقت
• ذبحت
باقى الطواف والسعى ممكن بعدين
ومن حقكك تخلع الإحرام وتتحلّل التحلل الأصغر ( لك كل شيء إلا الجماع ) واذا حبيت تروح تطوف وتسعى للإفاضة تمام أو تأجلهم للوداع
اليوم ال ١١ تتتجه لرمى الجمرات
٧ للصغرى
٧ للوسطى
٧ للكبرى
وف اليوم الثانى عشر لو هتتعجل ياريت ترمى قبل المغرب وتخرج من حدود منى ( لازم تطلع قبل المغرب ) لو لم تستطع الخروج قبل المغرب فعليك أن تتم ال٣ أيام ( يعنى هتبات لليوم التالت وترمى فيه نفس جمرات يومي الحادى والثانى عشر
• يبقى طواف الإفاضة والوداع
تتمهم وتتحلل التحلل الأكبر.
وبكده تكون أتممت حجك وربنا يتقبل من الجميع والكلام ده للإخوة اللى ماعندهم مخيمات وده أفضل مقترح تعلمته بفضل الله
• نصائح مختصرة ولعلها تنفع الحجاج
تقبل الله حجكم وأتم عليكم ستره وفضله
ومن دعا لنا فله بمثل ما دعا وزيادة
